View in English

Te noho takatū

Ko tētahi o ngā mea nui katoa hei whai mā koutou ko tō whānau e tiakina ai ō koutou hauora, ko te rēhita ki tētahi rata ā-hapori i tō takiwā e whai tākuta ai mō koutou anō.

Ko tā te pae tukutuku o Healthpoint he whakaatu i ngā pārongo hou katoa e pā ana ki ngā ratonga hauora i tō takiwā. Te rapu ratonga i Healthpoint – he aratohu ā-ataata

Te tiaki i a koe anō

Me whai rongoā patu mamae, me whai piritāpi, me whai kirīmi patuero hoki tō pātaka rongoā. Hokona ai ēnei mea katoa e te hokomaha e pātata ana ki a koe.

Ko Health Navigator me Healthline ētahi rauemi utu kore hei toro māu e whiwhi ai koe i ngā kōrero me whai, e pai ai hoki tō tiaki i a koutou anō ko tō whānau:

Health Navigator

Ko te pae tukutuku o Health Navigator tētahi wāhi kotahi e kite ai ngā tāngata o Aotearoa i ētahi rauemi e horopū ana, e pono ana hoki mō tā te tangata tiaki i a ia anō NZ health information | Health Navigator NZ

Healthline

Waea atu ki te 0800 611 116 i ngā hāora e 24 i te rā / i ngā rā e 7 o te wiki e mau ai i a koe ētahi tohutohu mō te hauora, kāore nei he utu. Kei te tīma o Healthline ētahi nēhi kua rēhitangia, ētahi manapou tata me ētahi kaitohutohu mō te hauora, ka mutu, he mātanga rātou ki te aromatawai, ki te tohutohu hoki mā te waea e pā ana ki ngā take hauora katoa, ahakoa te iti. E wātea ana hoki ētahi kaiwhakawhiti reo.

Ko ētahi atu waea āwhina, kei reira rā ētahi pārongo me te tautoko

• 1737, E pīrangi ana rānei ki te kōrero? - me waea, me pātuhi ā-utu kore rānei i ngā hāora e 24, i ngā rā e 7 e hono ai koe ki tētahi kaitohuora mō te hauora hinengaro me te wara. Waea atu, pātuhi atu rānei ki te: 1737
• 0508 TAUTOKO (82 88 65) Suicide Crisis Helpline
• Alcohol Drug Helpline - i ngā hāora e 24, i ngā rā e 7. Waea atu ki te 0800 787 797
• Lifeline - Waea atu ki te 0800 543 354
• Depression Helpline - Waea atu ki te 0800 111 757
• Youthline - me pātuhi ā-utu kore ki te 234. Waea atu ki te 0800 376 633
• Plunketline – 0800 933 922
• Family Violence Information Line - 0800 456 450

Te taka rongoā 

He kiringaio haumanu ā-hauora ngā mātanga taka rongoā, ka taea nei e rātou te tuku tohutohu mō ngā rongoā me ētahi punua take hauora. E āhei ana tā ngā whare taka rongoā hoko atu i ngā rongoā “tūtohu kore” (kāore e mate ana ki te whai tūtohu), ā, he maha tonu ngā whare taka rongoā e tuku kano ārai ana. Kimihia he mātanga taka rongoā e tata ana ki a koe mā te toro ki Healthpoint.

Te rata ā-hapori

Mehemea kei te māuiui koe, ā, ehara i te take ohotata (ina pērā me waea kē koe ki te 111), me whakapā atu koe ki tō rata ā-hapori, ahakoa te hāora. Mā reira koe e ārahi ki te ratonga hauora e pātata katoa ana ki a koe, e wātea ana hoki ki a koe. Kimihia he rata ā-hapori i tō takiwā i Healthpoint

E pai ana hoki kia waea atu koe ki a Healthline, ahakoa te hāora i te awatea, i te pō rānei, mā te 0800 611 116, kia kōrero ai koe ki tētahi kiringaio hauora, kāore nei he utu.

Te haumanu ā-totoa, i tua hoki i ngā hāora mahi

Kua whakaroahia ngā hāora e tuwhera ai ētahi o ngā rata ā-hapori. E tū ana hoki ētahi Whare Haumanu ā-Totoa puta noa i ngā takiwā katoa. Ka kitea ngā nama waea, ngā hāora e tuwhera ai, me ētahi atu taipitopito mō aua whare rā i te pae tukutuku o tō takiwā e pā ana ki te hauora.  Kimihia te pae tukutuku o tō takiwā e pā ana ki te hauora

Te Wāhanga Ohotata (ED)

Me uru te tangata ki te Wāhanga Ohotata kei ngā hōhipera katoa mō ngā take ohotata, i ngā wā e mōrearea ana rānei, e whakahemohemo ana rānei ia. Kei te pae tukutuku o tō takiwā pātata e pā ana ki te hauora te rārangi o ngā hōhipera o tō rohe pātata.

Mehemea kāore koe e kaha ana ki te kuhu i a koe anō kia haere ki te Wāhanga Ohotata, me waea koe ki te 111, ka tono ai i te “ambulance” (waka tūroro).